Real Madrid náði þriggja stiga forskoti

Leikmenn Real Madrid fagna. Reuters

Real Madrid náði í kvöld þriggja stiga forskoti á toppi spænsku 1. deildarinnar í knattspyrnu þegar liðið sigraði Sporting Gijon, 3:1, á heimavelli sínum.

Gestirnir náðu forystu á 53. mínútu en á 13 mínútna kafla gerðu heimamenn út um leikinn með þremur mörkum. Rafael van der Vaart jafnaði metin á 55. mínútu, Xabi Alonso kom Madridarliðinu yfir á 57. mínútu og Gonzalo Higuain innsiglaði sigurinn á 68. mínútu.

Real Madrid hefur 68 stig í efsta sæti. Barcelona hefur 65 stig en liðið sækir Zaragoza heim á morgun. Valencia er í þriðja sætinu með 47 stig.