Ibisevic genginn í raðir Stuttgart

Vedad Ibisevic í leik með Hoffenheim. Reuters

Bosníumaðurinn Vedad Ibisevic sem Gylfi Þór Sigurðsson lék með hjá þýska liðinu Hoffenheim er genginn í raðir Stuttgart. Framherjinn, sem er 27 ára gamall, skrifaði undir fjögurra og hálfs árs samning við Stuttgart og er talið að kaupverð félagsins á honum sé um 5 milljónir evra eða sem svarar um 807 milljónum íslenskra króna.

„Ég er mjög ánægður að félagaskiptin hafi gengið í gegn. Stuttgart er frábært félag og það eru miklir hæfileikar í liðinu,“ sagði Ibisevic við fréttamenn í dag.

Stuttgart er í 10. sæti þýsku deildarinnar en Hoffenheim er tveimur sætum ofar. Ibisevic hefur leikið með Hoffenheim frá árinu 2007 og skoraði hann 48 mörk í 123 leikjum með liðinu.