Kristinn dæmir hörkuleiki á Spáni

Kristinn Jakobsson dæmir á Spáni. mbl.is

Kristinn Jakobsson, milliríkjadómari í knattspyrnu, er kominn til La Manga á Spáni þar sem hann dæmir tvo leiki milli norskra og sænskra liða á æfingamótum á laugardag og sunnudag.

Á laugardaginn dæmir hann viðureign Tromsö frá Noregi og Kalmar frá Svíþjóð, og á sunnudag er það viðureign tveggja af stærstu félögunum á Norðurlöndum, leikur á milli Rosenborg frá Noregi og IFK Gautaborg frá Svíþjóð.

Kristinn dæmir á mótinu í boði norska knattspyrnusambandsins. Dómaranefnd KSÍ valdi síðan þá Birki Sigurðarson og Smára Stefánsson til að fara með honum til Spánar og vera aðstoðardómara á leikjum hans.