Real og Barcelona unnu bæði

Sergio Ramos fagnar sigurmarki sínu í kvöld. Reuters

Staðan í baráttunni um spænska meistaratitilinn er óbreytt, Real Madrid er áfram með 7 stiga forskot, því bæði liðin unnu leiki sína í 1. deildinni í kvöld.

Real Madrid sótti heim nágranna sína í Getafe og vann þar 1:0 sigur. Varnarmaðurinn Sergio Ramos skoraði markið eftir 18 mínútna leik, eftir sendingu frá Mesut Özil.

Barcelona tók á móti Real Sociedad og vann 2:1. Cristian Tello og Lionel Messi skoruðu fyrir Barcelona áður en Carlos Vela minnkaði muninn fyrir Baskana.

Real Madrid er með 55 stig en Barcelona 48. Valencia er síðan í þriðja sætinu með 36 stig.

Lionel Messi og Cristian Tello skoruðu fyrir Barcelona og fagna hér marki þess síðarnefnda. Reuters