Þrjú íslensk mörk fyrir Halmstad

Guðjón Baldvinsson skoraði tvívegis í dag. mbl.is/Eggert

Guðjón Baldvinsson skoraði tvö mörk og Kristinn Steindórsson eitt fyrir sænska B-deildarliðið Halmstad í dag þegar það sigraði C-deildarliðið Lund, 4:2, í æfingaleik.

Staðan var 4:0 í hálfleik eftir tvö glæsimörk Guðjóns og eitt frá Kristni sem auk þess lagði upp eitt marka liðsins. Jónas Guðni Sævarsson gat ekki leikið með Halmstad í dag vegna veikinda.

Guðjón kom til liðs við Halmstad í vetur frá KR og Kristinn frá Breiðabliki en sænska félagið féll úr úrvalsdeildinni í haust. Jónas Guðni hefur leikið með því frá 2009.