Búið að vera vandræðalegt
Elísabet Gunnarsdóttir, þjálfari Kristianstad. mbl.is/Kristinn
Afar sérstök staða er komin upp í heimi knattspyrnukvenna í ljósi þess að bandaríska atvinnumannadeildin var óvænt blásin af í síðustu viku. Skyndilega er fjöldinn allur af landsliðskonum, héðan og þaðan úr heiminum, með lausa samninga og í leit að nýjum vinnustað.
Elísabet Gunnarsdóttir, þjálfari Kristianstad í sænsku úrvalsdeildinni, hefur ekki farið varhluta af þessu. „Það má eiginlega segja að þetta sé búið að vera vandræðalegt. Ég hef byggt upp góð sambönd í knattspyrnuheiminum á undanförnum árum og fleiri en tuttugu leikmenn hafa haft samband síðustu daga og vilja koma til Kristianstad. Sjálfsagt hafa þeir samband við fleiri félög en þetta er samt sem áður mikill fjöldi. Í gær höfðu fimmtán eða tuttugu leikmenn samband og í dag hafa sex leikmenn bæst við. Ég get því ímyndað mér að heildartalan eigi eftir að fara yfir fjörutíu leikmenn,“ sagði Elísabet þegar Morgunblaðið ræddi við hana um miðjan dag á föstudaginn.
Nánar er rætt við Elísabetu í átta síðna íþróttablaði Morgunblaðsins í dag.
