Vonir Barcelona dvína enn

Victor Valdés markvörður og Gerard Piqué miðvörður Barcelona súrir í bragði eftir mark Osasuna í kvöld. AP

Vonir Barcelona um að halda spænska meistaratitlinum í knattspyrnu í Katalóníu dvínuðu enn frekar í kvöld þegar meistararnir töpuðu 3:2 fyrir Osasuna á útivelli í spænsku 1. deildinni.

Osasuna, sem er í 7. sæti deildarinnar, komst í 2:0 með tveimur mörkum frá Dejan Lekic. Alexis Sánchez minnkaði muninn fyrir Barcelona á 51. mínútu, Raúl Garcia bætti við marki fyrir heimamenn fimm mínútum síðar en Cristian Tello átti lokaorðið fyrir Börsunga á 73. mínútu.

Real Madrid er með 55 stig en Barcelona 48 og Real getur nú aukið forskotið í tíu stig annað kvöld þegar liðið fær Levante í heimsókn á Santiago Bernabéu.