Carroll hetja Olympiacos í Moskvu
Pablo Orbaiz hjá Olympiacos og Nelson Valdez hjá Rubin Kazan í leiknum í dag. Varamennirnir eru vel dúðaðir í frostinu eins og sést í bakgrunni. AP
Norðurírski markvörðurinn Roy Carroll, sem m.a. varði mark Manchester United á árum áður, var bjargvættur Olympiacos gegn Rubin Kazan í Evrópudeild UEFA í dag, eftir að hafa komið inn á sem varamaður í fyrsta leik sínum með gríska félaginu.
David Fuster kom Olympiacos yfir á 71. mínútu en tveimur mínútum síðar var markvörður Grikkjanna, Balázs Megyri, rekinn af velli og dæmd á hann vítaspyrna, fyrir að brjóta á Gökdeniz Karadeniz, leikmanni Rubin Kazan.
Carroll kom inn á fyrir Megyri og gerði sér lítið fyrir og varði vítaspyrnuna frá Bebras Natcho. Grikkirnir héldu síðan út síðasta korterið, manni færri, og unnu dýrmætan útisigur, 1:0, en þetta var fyrri viðureign liðanna í 32 liða úrslitum keppninnar.
Roy Carroll kastar sér og hirðir boltann af tánum á Aleksandr Ryazantsev, leikmanni Rubin Kazan, í leiknum í dag. Reuters
Carroll, sem varði mark Manchester United frá 2001 til 2005, spilaði með OFI Krít í Grikklandi fyrri hluta vetrar en lék þar á undan í tvö ár með Rúrik Gíslasyni og félögum í danska liðinu OB.
Leikið var í Moskvu þar sem ekki var hægt að spila í Kazan, sem er austur í Úralfjöllum, á mörkum Evrópu og Asíu, vegna veðurs og vallarskilyrða. Kazan er um 800 kílómetra austan við Moskvu og leikmenn Rubin þurftu því að fara í langt ferðalag til að spila heimaleikinn á Luzhniki-leikvanginum í Moskvu. Stuðningsmenn liðsins óku margir hverjir í 10 tíma til að komast á völlinn. Í Moskvu fór leikurinn fram í 15 stiga frosti.
Stuðningsmenn Rubin Kazan létu margir hverjir frostið í Moskvu ekki hindra sig í að spóka sig berir að ofan á ... Reuters
