Góð úrslit fyrir Ísland - leikmaður ÍBV jafnaði

Julie Nelson, til hægri, miðvörður ÍBV, skoraði jöfnunarmarkið í Belgíu. Eggert Jóhannesson

Belgía og Norður-Írland skildu jöfn, 2:2, í undankeppni heimsmeistaramóts kvenna í knattspyrnu í Dessel í Belgíu í kvöld en liðin eru með íslenska landsliðinu í riðli. Með sigri hefði belgíska liðið getað jafnað það íslenska að stigum en Julie Nelson, leikmaður ÍBV, sá til þess að svo yrði ekki þegar hún jafnaði leikinn fyrir Norður-Íra sjö mínútum fyrir leikslok.

Belgar komust yfir á 44. mínútu en norðurírska liðið jafnaði metin á sjöttu mínútu síðari hálfleiks. Aðeins fjórum mínútum síðar komust Belgar yfir á nýjan leik en leikmenn Norður-Íra neituðu að játa sig sigraða.

Fimm núverandi og fyrrverandi leikmenn íslenskra liða voru í byrjunarliði Norður-Íra í kvöld, auk Nelson þær Emma Higgins sem verður markvörður KR í sumar og lék áður í Grindavík, Sarah McFadden, Ashley Hutton og Rachel Furness.

Ísland er efst í riðlinum með 13 stig að loknum fimm leikjum. Belgar hafa 11 stig og hafa spilað leik meira. Norður-Írland er með með átta stig eftir fimm leiki, Noregur sex stig að loknum fjórum leikjum, Ungverjar eru með fjögur stig eftir fimm leiki og Búlgarar reka lestina án stiga.