Halldór Orri í stað Elmars til Japan

Halldór Orri Björnsson í leik með Stjörnunni. mbl.is/Kristinn

Theódór Elmar Bjarnason, leikmaður Randers í Danmörku, hefur dregið sig út úr landsliðshópnum í knattspyrnu fyrir vináttuleikinn gegn Japan næsta föstudag.

Heimir Hallgrímsson aðstoðarlandsliðsþjálfari staðfesti þetta við mbl.is og sagði að Elmar hefði meiðst í æfingaleik með Randers um helgina.

Í staðinn hefur Halldór Orri Björnsson úr Stjörnunni verið valinn í landsliðshópinn og hann á því möguleika á að spila sinn fyrsta A-landsleik í Osaka.

Íslenska liðið heldur til Japans á þriðjudagsmorguninn og kemur á áfangastað á miðvikudagsmorgni, rúmum tveimur sólarhringum fyrir leik.