Ingólfur skoraði gegn CSKA

Ingólfur Sigurðsson í leik með Val gegn ÍBV. mbl.is/Golli

Ingólfur Sigurðsson, knattspyrnumaðurinn ungi sem gekk til liðs við danska úrvalsdeildarliðið Lyngby fyrir skömmu, skoraði í dag sitt fyrsta mark fyrir félagið.

Lyngby vann þá sigur, 3:2, á 21-árs liði rússneska félagsins CSKA Moskva en liðin mættust í Antalya í Tyrklandi þar sem þau dvelja í æfingabúðum.

Ingólfur, sem varð 19 ára fyrr í þessum mánuði og spilaði 12 leiki með Val í úrvalsdeildinni síðasta sumar, lék allan leikinn með Lyngby og kom liðinu í 3:1 á 78. mínútu.