„Þessi meiðsli komu á versta tíma“
Theódór Elmar Bjarnason í leik gegn Portúgölum. mbl.is/Kristinn Ingvarsson
„Sjálfsagt er aldrei hægt að tala um að maður meiðist á góðum tíma, en það er þó óhætt að segja að þessi meiðsli hjá mér hafi komið á versta tíma,“ sagði knattspyrnumaðurinn Theódór Elmar Bjarnason við Morgunblaðið í gær.
Hann spilar ekki fótbolta aftur fyrr en í fyrsta lagi seint á þessu ári, eftir að hafa slitið bæði krossband og liðband í hné í æfingaleik með danska liðinu Randers á laugardaginn.
„Þetta var slysalegt, ég var í þann veginn að taka boltann af leikmanni OB þegar hann datt á mig. Ég stóð í fótinn, fékk slink á hnéð og það gaf sig með þessum afleiðingum,“ sagði Elmar.
Hann var ekki frá því að gervigrasið og skóbúnaðurinn hefðu haft sitt að segja.
„Leikurinn var á gervigrasi af nýjustu tegund, í Óðinsvéum, en ég var í grasskóm. Líklega var fóturinn fastari í grasinu vegna takkanna og gæti hafa gert útslagið. Það eru allavega meiri líkur á að verða fyrir þessu á gervigrasi en á náttúrulegu grasi,“ sagði Elmar sem mætti ekki félaga sínum Rúrik Gíslasyni í leiknum við OB. Rúrik var hvíldur vegna smávægilegra meiðsla.
Sjá lengra viðtal við Elmar í Morgunblaðinu í dag.
