Hannes semur við Atyrau
Hannes Þ. Sigurðsson (t.h.) í leik. mbl.is/ÞÖK
Knattspyrnumaðurinn Hannes Þ. Sigurðsson mun skrifa undir samning við Atyrau frá Kasakstan á morgun að undangenginni læknisskoðun. Hannes hefur verið við æfingar hjá liðinu í Tyrklandi undanfarna daga og í kjölfarið var honum boðinn samningur.
Eins og Morgunblaðið greindi frá á dögunum var Hannes við æfingar hjá Aktobe frá Kasakstan, sem var einnig í æfingabúðum í Tyrklandi. Honum var ekki boðinn samningur og kom heim en hélt nokkru síðar aftur til Tyrklands eftir að forráðamenn Atyrau settu sig í samband við hann.
Það þarf vart að taka það fram að Hannes verður fyrsti íslenski knattspyrnumaðurinn til að spila með liði frá Kasakstan en hann skráði nafn sitt í sögubækurnar í fyrra þegar hann varð fyrstur Íslendinga til að spila í rússnesku deildinni þegar hann gekk í raðir Spartak Nalchik.
Nánar í íþróttablaði Morgunblaðsins í dag.
