Samið við Ungverja um landsleik

Ungverjar fagna marki í leiknum við Ísland síðasta sumar. Reuters

Samið hefur verið um að karlalandslið Íslands og Ungverjalands í knattspyrnu leiki vináttulandsleik á Laugardalsvellinum eftir rúmt ár, mánudaginn 3. júní 2013. Frá þessu er greint á vef KSÍ.

Leikurinn er hluti af samkomulagi knattspyrnusambanda landanna um leiki sem gert var á síðasta ári en þá sóttu Íslendingar Ungverja heim til Búdapest 10. ágúst í vináttulandsleik. Ungverjar unnu þá viðureign, 4:0.

Leikurinn verður liður í undirbúningi íslenska landsliðsins fyrir heimaleik gegn Slóveníu í undankeppni HM sem fer fram á Laugardalsvellinum fjórum dögum síðar, 7. júní.