Japanir sigruðu Norðmenn

Yuki Nagasato í leik gegn Þór/KA í haust. mbl.is/Skapti Hallgrímsson

Japönsku heimsmeistaranir í knattspyrnu kvenna lögðu Norðmenn að velli, 2:1, í fyrsta leik Algarve-bikarsins í Portúgal sem fram fór í dag. Liðin leika í B-riðlinum en viðureign Íslands og Evrópumeistara Þýskalands stendur yfir í A-riðlinum.

Isabell Herlovsen kom norska liðinu yfir á 17. mínútu en Yuki Nagasato, samherji Margrétar Láru Viðarsdóttur hjá Turbine Potsdam, jafnaði fyrir Japani á 45. mínútu. Nagasato skoraði einmitt þrennu fyrir Potsdam gegn Þór/KA í fyrri leik liðanna í Meistaradeild kvenna á Þórsvellinum síðasta haust.

Það var svo Naomi Kawasumi sem skoraði sigurmark Japana á 66. mínútu.

Hin tvö liðin í B-riðli eru Bandaríkin og Danmörk og þau mætast á eftir.