Spænski miðjumaðurinn Xabi Alonso hefur skrifað undir tveggja ára saming við Þýskalandsmeistara Bayern München, en hann kemur til félagsins frá Real Madrid á Spáni.
Alonso var í fimm ár hjá Real eftir að hafa komið frá Liverpool og vann Meistaradeildina í vor. Hann skrifaði undir nýjan samning við félagið í janúar síðastliðnum, en félögin náðu samkomulagi um félagaskiptin í gær og eftir læknisskoðun í gærkvöldi skrifaði hann undir samning í morgun.
Alonso sagði á dögunum skilið við spænska landsliðið, en hann lék á sínum tíma 114 landsleiki og varð tvívegis Evrópumeistari og einu sinni heimsmeistari.