Guðmundur Þórarinsson, leikmaður Sarpsborg í Noregi og U21-landsliðs Íslands, er í sigtinu hjá danska úrvalsdeildarfélaginu Nordsjælland samkvæmt frétt Tipsbladet í Danmörku.
Guðmundur hefur verið í lykilhlutverki hjá Sarpsborg síðan hann kom til liðsins frá ÍBV og hefur Selfyssingurinn vakið áhuga Nordsjælland auk fleiri danskra félaga samkvæmt Tipsbladet. Ekkert verður af félagaskiptum í dag en hugsanlegt er að Nordsjælland reyni að fá Guðmund eftir tímabilið í Noregi sem lýkur í nóvember.
Nordsjælland leikur undir stjórn Ólafs Kristjánssonar og hjá liðinu er markvörðurinn Rúnar Alex Rúnarsson. Þá er Guðjón Baldvinsson búinn að semja um að koma til liðsins um áramótin.