Eyjamaðurinn Eiður Aron Sigurbjörnsson bættist í kvöld í hóp íslenskra markaskorara í norsku úrvalsdeildinni í knattspyrnu en hann gerði mark Sandnes Ulf þegar liðið gerði jafntefli, 1:1, við Brann á útivelli.
Eiður kom til liðs við Sandnes í ágúst, fór þá frá ÍBV þegar Örebro í Svíþjóð, þar sem hann er samningsbundinn, lánaði hann til norska félagsins. Hann lék í kvöld sinn annan leik og kom Sandnes yfir á 52. mínútu. Amin Askar jafnaði fyrir Brann tíu mínútum síðar og þar við sat.
Hannes Þór Halldórsson varði mark Sandnes að vanda og Hannes Þ. Sigurðsson lék allan leikinn í fremstu víglínu liðsins. Eiður var á sínum stað í vörninni allan tímann.
Sandnes Ulf situr á botni deildarinnar með aðeins 15 stig þegar sex leikjum er ólokið og hæpið er að liðið nái að halda sér uppi. Brann er með 23 stig í fjórða neðsta sæti en á milli eru Haugesund og Sogndal sem eru með 21 stig og eiga leik til góða. Tvö neðstu liðin falla og það þriðja neðsta fer í umspil.
Birkir Már Sævarsson kom inná sem varamaður hjá Brann undir lok leiksins en hann hefur mátt verma varamannabekkinn undanfarnar vikur eftir að hafa vart misst úr leik um árabil.