Stórstjörnurnar í liði Real Madrid virðast heldur betur hrokknar í gang eftir slaka byrjun á tímabilinu í spænsku 1. deildinni í knattspyrnu. Cristiano Ronaldo skoraði þrennu, Gareth Bale og Javier Hernández tvennur, og James Rodríguez eitt í ótrúlegum 8:2-sigri á Deportivo la Coruna um helgina.
Ronaldo hefur þar með skorað 20 þrennur á aðeins rúmum fimm tímabilum í spænsku deildinni, og er tveimur þrennum frá því að jafna met Alfredo Di Stéfano og Telmo Zarra.
Barcelona hefur byrjað tímabilið fullkomlega, ekki enn fengið á sig mark og unnið alla fjóra leiki sína. Liðið vann Levante 5:0 í gær.