Sverrir Ingi á leið til Lokeren

Viking hefur ákveðið að taka tilboði Lokeren í miðvörðinn Sverri Inga Ingason. Hann mun gangast undir læknisskoðun um helgina og ætti að geta skrifað undir samning við belgíska félagið í kjölfarið.

Þetta fullyrðir norska blaðið Aftenposten í dag. Í gær greindu norskir miðlar frá því að fyrsta tilboði Lokeren hefði verið hafnað en Viking hafði áður hafnað tveimur tilboðum frá Nordsjælland í Danmörku. Núna er samkomulag í höfn og mun Lokeren greiða yfir 6 milljónir norskra króna fyrir Sverri, jafnvirði rúmlega 100 milljóna íslenskra króna. Þetta gerir Sverri að 8. dýrasta leikmanninum í sögu Viking.

Sverrir á eftir að semja persónulega við Lokeren en eins og fram kom í Morgunblaðinu í dag hefur hann mikinn áhuga á að ganga í raðir félagsins og því virðist ekkert standa í vegi fyrir að það gangi eftir.

Viking keypti Sverri fyrir 1 milljón norskra króna frá Breiðabliki fyrir rúmu ári síðan, og hann hefur því sexfaldast í verði eftir sína fyrstu leiktíði í atvinnumennsku. Breiðablik fær ákveðið hlutfall af kaupverðinu nú í sinn hlut.

Lokeren er í 8. sæti belgísku úrvalsdeildarinnar með 33 stig, í harðri baráttu um að komast í sex liða úrslitakeppnina. Félagið seldi nýverið annan miðvörð, Alexander Scholz, til Standard Liége en Scholz er Íslendingum að góðu kunnur eftir að hafa leikið með Stjörnunni hérlendis.

• Blogga um frétt