Arnór Ingvi Traustason skoraði fyrsta markið í 2:1 sigri Norrköping gegn Åtvitaberg í sænsku úrvalsdeildinni í knattspyrnu í dag.
Arnór kom Norrköping í forystu á 55. mínútu með marki sínu, en liðsfélagi hans, Emir Kujovic, hafði brennt af víti í fyrri hálfleik. Það tók Aatvitaberg ekki nema 6 mínútur að jafna metin með marki Victors Skoeld en Arnór og félagar báru sigur úr býtum eftir að Christoffer Nyman, sem lagði mark Arnórs upp, skoraði á 74. mínútu. Arnór spilaði allan leikinn.
Norrköping komst í 5. sæti deildarinnar með 13 stig að sjö leikjum loknum.