„Ég er opinn fyrir því að leika sem lánsmaður með Sandnes út þetta tímabil. Gallinn er hinsvegar sá að Start er bara með tvo markverði og þyrfti þá að finna sér annan í stað mín,“ sagði Ingvar Jónsson, markvörður hjá Start í Noregi, við Morgunblaðið í gær.
Sandnes Ulf, sem missti landsliðsmarkvörðinn Hannes Þór Halldórsson til NEC í Hollandi fyrr í vikunni, vill fá Ingvar til að fylla hans skarð.
Ingvar kom til Start í vetur frá Stjörnunni en hefur aðeins fengið tækifæri í einum leik í úrvalsdeildinni og annars verið varamaður fyrir Håkon Opdal í leikjum tímabilsins. Hann er þó ekki bjartsýnn á að af því verði að hann fari til Sandnes.
„Svo gæti Håkon farið í júlí og samið við annað félag. Hans samningur rennur út eftir tímabilið og þeir hjá Start hafa gefið í skyn að ég sé þeirra framtíðarmarkvörður og verði númer eitt á næsta tímabili. Maður verður því bara að bíða þolinmóður og sjá hvað gerist á komandi vikum,“ sagði Ingvar Jónsson sem hefur verið af og til í íslenska landsliðshópnum og hefur spilað tvo A-landsleiki á undanförnum mánuðum.