Guðný Björk Óðinsdóttir, landsliðskona í knattspyrnu til skamms tíma, hefur tekið fram skóna á ný með sænska úrvalsdeildarliðinu Kristianstad en hún hætti í fyrravor vegna þrálátra meiðsla.
Guðný, sem hefur verið með eindæmum óheppin með meiðsli á ferlinum, lék með Kristianstad frá árinu 2008 en hætti eftir að hún hafði spilað tvo deildarleiki í upphafi síðasta tímabils.
Hún kom inná sem varamaður í byrjun síðari hálfleiks í æfingaleik gegn Bröndby frá Danmörku um helgina og skoraði mark Kristianstad í 2:1 ósigri.
Elísabet Gunnarsdóttir hefur þjálfað Kristianstad frá 2008 og Sif Atladóttir leikur einnig með liðinu.
Guðný er 27 ára gömul en hún á að baki 86 leiki í sænsku úrvalsdeildinni og 42 landsleiki fyrir Íslands hönd.
Viðtal við Guðnýju frá 8. maí 2015.