Kolbeinn Sigþórsson er enn frá vegna meiðsla og hann var ekki í leikmannhópi Nantes sem vann 1:0 sigur gegn Nice í frönsku efstu deildinni í knattspyrnu í dag.
Kolbeinn hefur glímt við hnémeiðsli í rúmar tvær vikur og misst af þremur leikjum Nantes á þeim tíma. Nantes er í níunda sæti deildarinnar með 48 stig eftir sigur liðsins í dag.
Andri Sigþórsson, bróðir og umboðsmaður Kolbeins, gerði sér vonir um að Kolbeinn myndi ná sér í tæka tíð fyrir leikinn gegn Marseille um síðustu helgi, en ljóst er að meiðslin eru alvarlegri en Andri taldi í fyrstu.