Þarft að sýna þessari keppni virðingu

Ensku sóknarmennirnir hjá Liverpool, þeir Adam Lallana og Daniel Sturridge voru í skýjunum yfir 3:0 sigri liðsins á Villarreal í undanúrslitum Evrópudeildarinnar í knattspyrnu.

Sigurinn fleytti Liverpool í úrslit keppninnar þar sem liðið mætir tvöföldum Evrópudeildarmeisturum Sevilla í úrslitum þann 18. maí í Basel.

Daniel Sturridge spilaði sínar aðrar 90 mínútur í röð fyrir Liverpool í sigrinum í kvöld en hann hefur verið mikið frá á tímabilinu vegna meiðsla.

„Strákarnir eiga skilið að vera komnir í úrslitaleikinn og vonandi getum við unnið hann. Það þarf að sýna þessari keppni virðingu og ég tel okkur hafa gert það,” sagði Adam Lallana eftir leikinn.

„Það skiptast á skin og skúrir í fótbolta. Þú þarft að vera reiðubúinn að láta líkamann vinna og taka áhættur. Þetta er frábær tilfinning,” sagði Sturridge eftir leikinn.

Adam Lallana faðmar Phillipe Coutinho innilega og fagnar sigrinum. Daniel Sturridge til vinstri. AFP

• Blogga um frétt