Kínverska úrvalsdeildarfélagið Shanghai SIPG er við það að ganga frá samningum við brasilíska framherjann Hulk en hann kemur frá Zenit St. Pétursborg í Rússlandi. Hann verður dýrasti leikmaður deildarinnar frá upphafi.
Hulk, sem er 29 ára gamall, hefur leikið með Zenit síðustu fjögur árin en þar áður var hann í portúgalska stórliðinu Porto.
Hann er nú á leið til Kína en hann mun semja við Shanghai SIPG á allra næstu klukkutímum en félagaskiptin gera hann að dýrasta leikmanni deildarinnar. Hann mun kosta Shanghai 58 milljónir evra og bætir þar með met Alex Teixeira sem fór til Jiangsu Suning á 50 milljónir evra í febrúar.
Hulk mun þéna um það bil 20 milljónir evra á ári sem gera hann að launahæsta leikmanni heims en Cristiano Ronaldo þénar um það bil 17 milljónir evra á ári.