Af öllum atburðum ársins sem nú er að líða þá tjáði breska þjóðin sig mest um tap Englands gegn Íslandi í 16-liða úrslitum EM karla í knattspyrnu. Sú var að minnsta kosti raunin hjá notendum Twitter.
Englendingar voru í sárum eftir 2:1-tapið gegn Íslendingum sem gerði út um vonir Roy Hodgson og hans manna um verðlaun á mótinu. Bretar skrifuðu 128.000 tíst á mínútu á meðan á leiknum stóð, sem er 21.000 tísti meira en þegar öskubuskuævintýri Leicester náði hámarki og liðið varð Englandsmeistari.
Tíu vinsælustu umræðuefnin hjá Bretum á Twitter voru öll tengd fótbolta, samkvæmt frétt BBC. Engu tísti var oftar endurtíst (e. retweet) en því þegar Leicester staðfesti að liðið væri orðið Englandsmeistari, eða alls 396.000 sinnum.