Breyta reglum um erlenda leikmenn

Kínverska knattspyrnusambandið hefur sett nýjar reglur sem snúa að erlendum leikmönnum í kínversku úrvalsdeildinni í knattspyrnu. 

Tímabilið í Kína hefst núna í mars og er deildin þar í landi að verða æ vinsælli með komu leikmanna eins og Oscar og John Obi Mikel frá Chelsea. 

Miklum fjáhæðum hefur verið eytt í erlenda leikmenn af kínverskum félögum undanfarið og voru einhverjir farnir að hafa áhyggjur af þróun mála þar í landi, þar sem kínverskir leikmenn gætu fengið minna að spreyta sig og hefði það því slæm áhrif á kínverska landsliðið.

Til að létta á áhyggjum þeirra hafa nú verið settar nýjar reglur um hversu marga erlenda leikmenn hvert lið má vera með á sínum snærum. 

Hvert lið má nú aðeins vera með þrjá erlenda leikmenn á vellinum í einu og aðeins fimm í leikmannahópnum fyrir hvern leik auk þess að lið verða að nota tvo kínverska leikmenn sem eru 23 ára eða yngri. Áður máttu vera fimm erlendir leikmenn í hverju liði en einn þeirra varð að vera frá öðru Asíuríki. Eins og áður mega liðin aðeins vera með markmenn frá Kína.

• Blogga um frétt