Kolbeinn Sigþórsson, landsliðsframherji í knattspyrnu og leikmaður Nantes í Frakklandi, fór í dag á ný til Frakklands þar sem hann hittir fyrir læknateymi félagsins.
Samkvæmt heimildum mbl.is frá Frakklandi mun hann gangast þar undir læknisskoðun á morgun, en það á eftir að ákveða hvort eigi að senda hann í aðra aðgerð. Andri Sigþórsson, bróðir og umboðsmaður hans, staðfesti við mbl.is í dag að kíkja eigi betur á hann og meta stöðuna á meiðslunum.
„Ætli verði ekki tekin ákvörðun fljótlega um hvað þurfi að gera, í samráði við félagið hans. Hvort hann þurfi að fara í aðra aðgerð, eða hvað þurfi til svo hann komist af stað aftur. Þetta er pínu óþægileg staða að vera í,“ sagði Andri við mbl.is í dag.
Kolbeinn hefur ekki spilað síðan í ágúst vegna meiðsla í hné og var lánssamningi hans við Galatasaray í Tyrklandi rift á dögunum af þeim sökum. Sjálfur sagðist Kolbeinn óttast um ferilinn.
Franska íþróttadagblaðið L'Equipe fullyrti fyrir helgi að forráðamenn Nantes viti ekkert um Kolbein eftir að hann yfirgaf Galatasaray. „Kolbeinn Sigþórsson finnst ekki“ sagði í fyrirsögn blaðsins.
Andri sagði þann fréttaflutning ekki réttan í samtali við mbl.is í síðustu viku. Það sem liggur fyrir núna er að taka ákvörðun hvort og þá hvenær Kolbeinn fari á ný undir hnífinn.