Skoski auðjöfurinn John Clarkson hefur samið um að greiða spænsku knattspyrnufélagi 150.000 evrur gegn því að hann fái að þjálfa liðið, sem leikur í 3. efstu deild Spánar.
Liðið sem um ræðir heitir Tudelano og er í 9. sæti í riðli 1 í spænsku 3. deildinni. Félagið var stofnað árið 1935 og er í eigu 800-900 stuðningsmanna þess. Félagið hefur ekki átt í teljandi fjárhagsvandræðum en var gert að greiða tvær sektir vegna vangoldinna skatta sem gæti hafa ráðið því að tilboði Clarkson var tekið. Þetta kemur fram í frétt AS um málið.
Þetta er alls ekki í fyrsta sinn sem Clarkson kaupir sér þjálfarastöðu hjá spænsku félagi. Hann hefur þjálfað þrjú lið og stýrði einu þeirra, Catarroja, til umspils um sæti í 2. deild fyrir þremur árum. Þess má geta að liðið féll úr keppni gegn Tudelano.
Clarkson mun greiða Tudelano 50.000 evrur á þessari leiktíð og 100.000 evrur á næstu leiktíð. Félagið var í leit að nýjum þjálfara eftir að Sergio Amatriain var sagt upp um jólin.