Sverrir Ingi Ingason er í byrjunarliði Granada sem er að hefja leik gegn Espanyol á útivelli í spænsku 1. deildinni í knattspyrnu og er þar með orðinn sjötti Íslendingurinn sem spilar í efstu deild á Spáni.
Granada keypti Sverri af Lokeren í vikunni og hann fer beint í lið eftir að hafa aðeins æft með liðinu í þrjá daga.
Aðrir sem hafa leikið í deildinni eru eftirtaldir:
Pétur Pétursson lék fyrstur Íslendinga í spænsku 1. deildinni með Hércules frá Alicante tímabilið 1985-86.
Þórður Guðjónsson lék með Las Palmas frá Kanaríeyjum í deildinni 2000-2002.
Jóhannes Karl Guðjónsson lék með Real Betis frá Sevilla í deildinni 2001-2003.
Eiður Smári Guðjohnsen lék með Barcelona í deildinni 2006-2009.
Alfreð Finnbogason lék með Real Sociedad frá San Sebastián í deildinni 2014-2015 og var í röðum félagsins til 2016.
Þá hafa tveir Íslendingar leikið í næstefstu deild Spánar. Magnús Bergs með Racing Santander árið 1984 og Diego Jóhannesson sem hefur verið leikmaður Real Oviedo frá 2014.