Sonni Ragnar Nattestad, færeyski landsliðsmiðvörðurinn sem Íslandsmeistarar FH seldu til norska liðsins Molde í desember, varð fyrir því óláni að slíta hásin á æfingu með Molde í vikunni og kemur því til með að missa af komandi leiktíð í Noregi.
„Þetta er mjög sorglegt og það mun líða langur tími þar til ég get spilað aftur en ég lofa því að koma sterkur til baka, segir Nettestad í viðtali við vefmiðilinn rbnett.no.
Sonni Ragnar, sem er 22 ára gamall hávaxinn miðvörður, gekk í raðir FH fyrir síðasta tímabilið og lék einn leik með því í Pepsi-deildinni og tvo bikarleiki áður en hann var lánaður til Fylkis þar sem hann spilaði átta leiki með Árbæjarliðinu.
Sonni Ragnar er fastamaður í færeyska landsliðinu en hann hefur spilað 16 leiki með því og hefur í þeim skorað eitt mark.
Tveir Íslendingar eru í herbúðum Molde, sóknarmennirnir Björn Bergmann Sigurðarson og Óttar Magnús Karlsson sem gekk í raðir liðsins frá Víkingi Reykjavík síðastliðið haust