Íþróttir | Fótbolti | mbl | 28.3.2017 | 23:15 | Uppfært 29.3.2017 3:13

Ronaldo fær flugvöll nefndan eftir sér

Cristiano Ronaldo skoraði á heimaslóðum í kvöld. AFP

Cristiano Ronaldo, besti knattspyrnumaður heims, mun verða heiðraður á ansi óvenjulegan hátt á morgun þegar heill alþjóðaflugvöllur verður nefndur eftir honum.

Um er að ræða flugvöllinn á eyjunni Madeira, þaðan sem Ronaldo kemur. Á eyjunni fór einmitt fram leikur Portúgals og Svíþjóðar í kvöld sem endaði með dramatískum sigri Svía, en á morgun verður athöfn á eyjunni þar sem nýja nafnið verður afhjúpað.

Stjórnmálamenn á eyjunni voru margir hverjir á móti því að breyta nafninu á flugvellinum, sem áður hét bara Madeira-flugvöllurinn. Á eyjunni er nú þegar stytta og safn tileinkað Ronaldo, auk þess sem heil hótelkeðja á staðnum heitir eftir honum.

„Stundum hefur þjóðarstoltið skammtímaminni, en Madeira hefur það ekki,“ sagði forseti heimastjórnar Madeira og gaf lítið fyrir gagnrýni sem heyrðist frá sumum stjórnmálamönnum.