Fannar Þór Friðgeirsson skoraði 7 mörk fyrir Hamm þegar liðið vann Hüttenberg, 30:26, í þýsku B-deildinni í handknattleik í kvöld. Ragnar Jóhannsson skoraði 6 mörk fyrir Hüttenberg en Aðalsteinn Eyjólfsson þjálfar liðið.
Handknattleiksmaðurinn efnilegi Sigtryggur Daði Rúnarsson hélt uppteknum hætti en hann skoraði 7 mörk þegar lið hans, Aue, tapaði fyrir Wilhelmshavener 33:27. Árni Sigtryggsson, föðurbróðir hans, skoraði 2 mörk fyrir Aue í dag en varnarjaxlinn Bjarki Már Gunnarsson komst ekki á blað.
Aron Rafn Eðvarðsson og samherjar hans í Bietigheim töpuðu 22:20 fyrir Dessau. Þá var Ólafur Bjarki Ragnarsson ekki í leikmannahópi Eisenach sem tapaði fyrir Leutershausen, 26:19.
N-Lübbecke er með 56 stig á toppnum þegar fimm umferðir eru eftir og fer örugglega upp. Bietigheim með 46 stig í öðru sæti, Hüttenberg með 43 stig í þriðja sæti og á leik til góða. Rimpar og Friesenheim eru með 42 og 41 stig og eiga einnig leik til góða. Bad Schwartau kemur þar á eftir með 40 stig en þrjú lið komast upp í efstu deild.
Hamm er í harðri fallbaráttu en liðið er í fallsæti, með 28 stig, jafnmörg og Leutershausen sem er sæti ofar.