Viðar Örn Kjartansson fékk í kvöld silfurverðlaunin í ísraelsku bikarkeppninni í knattspyrnu með Maccabi Tel-Aviv eftir tap í framlengdri vítaspyrnukeppni gegn Bnei Yehuda í úrslitaleiknum í Jerúsalem.
Viðar lék allan tímann með Maccabi Tel-Aviv en leikurinn endaði 0:0 eftir framlengingu. Útlitið var gott hjá liði hans í vítaspyrnukeppninni því þegar Viðar skoraði í þriðju umferð var lið hans komið í 3:1. En eftir það gekk allt á afturfótunum, liðið brenndi af þremur spyrnum í röð og fyrrverandi kempur úr ensku knattspyrnunni, Yossi Benayoun og Tal Ben Haim, voru sökudólgarnir í tvö síðari skiptin.
Bnei Yehuda, sem er líka frá Tel-Aviv, jafnaðí metin og skoraði síðan úr sinni spyrnu í fyrstu umferð bráðabanans og þar með var sigurinn í höfn.
Viðar hlaut þar með sín önnur silfurverðlaun á tímabilinu en Maccabi Tel-Aviv hafnaði í öðru sæti úrvalsdeildarinnar í Ísrael, á eftir Hapoel Beer Sheva. Hann varð hins vegar markakóngur deildarinnar með 19 mörk.