Tékkland og Þýskaland unnu leiki sína í dag á Evrópumóti U21 landsliða í knattspyrnu sem fram fer í Póllandi. Tékkar höfðu betur gegn Ítölum, 3:1, og Þýskaland vann Danmörku, 3:0.
Michal Trávník kom Tékkum yfir á 24. mínútu gegn Ítölum og reyndist það eina mark fyrri hálfleiks. Domenico Berardi jafnaði fyrir Ítalíu á 70. mínútu, en Marek Havlík og Michael Lüftner skoruðu fyrir Tékka á síðustu ellefu mínútunum og tryggðu 3:1 sigur.
Davie Selke, Marc-Oliver Kempf og Nadiem Amiri tryggðu Þjóverjum 3:0 sigur á Dönum en öll mörk leiksins komu í síðari hálfleik. Þjóverjar eru á toppi riðilsins með sex stig, Ítalir og Tékkar koma þar á eftir með þrjú og Danir reka lestina án stiga.