Mikið í húfi fyrir FH-inga

Íslandsmeistarar FH æfðu á Tórsvelli í Færeyjum í kvöld en á morgun mæta þeir færeysku meisturunum í Víkingi Götu í síðari viðureign liðanna í 2. umferð forkeppni Meistaradeildar Evrópu.

Spilað verður á Tórsvellinum í Þórshöfn á morgun sem er gervigrasvöllur, þjóðarleikvangur Færeyinga, og tekur sex þúsund áhorfendur. Dómari leiksins kemur frá Finnlandi og heitir Ville Nevalainen.

Liðin skildu jöfn, 1:1, í Kaplakrika í síðustu viku. Gríðarlega mikið er í húfi því liðið sem hefur betur í leiknum á morgun tryggir sér í það minnsta fjóra Evrópuleiki til viðbótar. Sigurliðið fer í 3. umferð forkeppni Meistaradeildarinnar og mætir þar væntanlega slóvenska meistaraliðinu Maribor.

Víkingur Götu hefur spilað 21 leik á heimavelli í Evrópukeppninni. Liðið hefur unnið 3 leiki, gert 4 jafntefli og tapað 14 og er eina færeyska liðið sem hefur komist í gegnum tvær umferðir í Evrópukeppni. Víkingarnir hafa slegið út lið frá Noregi, Finnlandi og Lettlandi á undanförnum árum.

• Blogga um frétt