Neymar alveg brjálaður við samherja

Brasilíska knattspyrnumanninum Neymar virðist vera nóg boðið eftir rifrildi við liðsfélaga sinn, úrúgvæska framherjann Edison Cavani, í leik PSG gegn Lyon í frönsku 1. deildinni í knattspyrnu um helgina.

Kapparnir rifust þá um hvor þeirra ætti að taka vítaspyrnu í leiknum, en svo fór að Cavani tók hana en brást bogalistin. Samkvæmt Teamtalk hélt rifrildi þeirra áfram eftir leik og er Neymar sagður fara fram á það við forráðamenn PSG að þeir selji Cavani í janúar.

Franskir miðlar hafa greint frá því að Cavani sé með klásúlu í samningi sínum sem gefi honum ríflegan bónus verði hann markahæsti leikmaður PSG á tímabilinu. Neymar, sem varð dýrasti knattspyrnumaður heims í sumar, er einnig sagður hafa slíka klásúlu og er hitinn þeirra á milli orðinn mikill.

Á meðan hefur knattspyrnustjórinn Unai Emery ekki viljað blanda sér í málið og sagt að kapparnir verði að leysa það sín á milli.

• Blogga um frétt