„Sköpunarkraftur af öðrum heimi"
Ólafur Stefánsson, sem hér brýst framhjá Ruben Garabaya, er einn besti handboltamaður sögunnar að mati Dana. AP
Allir helstu norrænu netfréttamiðlarnir hafa fjallað um sigur Íslands á Spánverjum í dag og þykir greinilega talsvert til koma. Á vef danska handboltasambandsins segir, að Ólafur Stefánsson, sem sé einn mesti handboltasnillingur sögunnar, hafi leitt íslenska liðið í úrslitaleik ólympíuleikanna og sýnt sköpunarkraft sem ekki sé þessa heims.
„Við getum aðeins hneigt okkur og þakkað fyrir frábæra handboltaupplifun," segir á vefnum.
Danskir fjölmiðlar benda margir á, að Snorri Steinn Guðjónsson, markahæsti leikmaður handboltakeppninnar í Peking, sé leikmaður danska liðsins GOG. Politiken nefnir einnig Ólaf Stefánsson, sem það segir hafa verið í fremstu röð leikmanna í heiminum í heilan mannsaldur.
Sænska blaðið Expressen segir, að Íslendingar hafi verið mun betri en Spánverjar í dag. Haft er eftir Magnus Grahn, handboltasérfræðingi Sænska sjónvarpsins, að Íslendingar séu stálmenn og sannir víkingar. Þeir eigi alveg möguleika gegn Frökkum, sem séu þó sennilega með besta liðið í keppninni.
Í mörgum miðlunum er þess getið, að Íslendingar hafi aðeins unnið þrenn verðlaun á ólympíuleikum til þessa og eru verðlaunahafarnir oftast nefndir til sögunnar, þau Vilhjálmur Einarsson, Bjarni Friðriksson og Vala Flosadóttir.
Danska handknattleikssambandið
Íslenskir áhorfendur í Peking á leik Íslands og Spánar. mbl.is/Brynjar Gauti
