Átta á unglingamót í badminton í Berlín

Íslenski hópurinn sem keppir í Berlín.

Unglingalandslið Íslands í badminton, skipað leikmönnum undir 19 ára aldri, er komið til Berlínar í Þýskalandi og tekur þar þátt í alþjóðlegu móti sem hefst á fimmtudaginn.

Átján þjóðir eiga fulltrúa á mótinu og keppendur eru 150 talsins en mót þetta var haldið í fyrsta skipti á síðasta ári. Þar af taka 72 þátt í einliðaleik karla.

Íslensku keppendurnir eru Egill G. Guðlaugsson, Haukur Stefánsson, Jónas Baldursson, Kári Gunnarsson, Elín Þóra Elíasdóttir, Jóhanna Jóhannsdóttir, Sunna Ösp Runólfsdóttir og Berta Sandholt.

Berta kemur í staðinn fyrir Rakel Jóhannesdóttur sem varð fyrir meiðslum á Íslandsmóti unglinga um síðustu helgi.

Íslensku keppendurnir taka allir þátt í einliðaleik, tvíliðaleik og tvenndarleik.