Misjafn árangur í Þýskalandi
Sverrir Vilhelmsson
Íslenska U19 landsliðið í badminton hefur spilað sjö leiki á German Junior 2010 mótinu í Berlín í Þýskalandi. Íslendingar hafa unnið tvær viðureignir en tapað fimm. Þá fékk einn úr íslenska liðinu gefins sigur gegn andstæðingi sínum í fyrstu umferð sem heltist úr lestinni áður en keppni hófst.
Kári Gunnarsson og Berta Sandholt unnu í tvenndarleik Skotana Craig Pollock og Kristy Gilmour 21-17 og 21-17. Í tvíliðaleik karla unnu Kári og Egill G. Guðlaugsson Philip Aspinall og Harley Towler frá Englandi 21-19 og 21-13.
Í tvenndarleik töpuðu Egill og Elín Þóra Elíasdóttir naumlega eftir oddalotu fyrir Jan Borsutzki frá Þýskalandi og Zuzana Pavelkova frá Tékklandi 14-21, 21-18 og 18-21.
Jónas Baldursson og Jóhanna Jóhannsdóttir töpuðu í tvenndarleik fyrir Kóreubúunum Dae Sun Kim og Eun Byul Ko 21-11 og 21-14. Í einliðaleik kvenna tapaði Elín Þóra fyrir So Hee Lee frá Kóreu 21-10 og 21-4. Jóhanna tapaði fyrir Lauren Meheust frá Frakklandi 21-11 og 21-17.
Berta fékk gefins leik sinn gegn Inken Wienefeld frá Þýskalandi og fer því beint í aðra umferð í einliðaleik kvenna.
Í einliðaleik karla tapaði Haukur Stefánsson fyrir Young Woong Ha frá Kóreu 21-5 og 21-10.
Þrír einliðaleikir karla eru eftir í dag en Jónas keppir við Jamie Van Hooijdonk frá Wales, Kári við Peter Lang frá Þýskalandi og Egill keppir við Morten Brödbæk frá Danmörku seinna í dag. Þá spila Berta og Elín við Lucie Havlova og Zuzana Pavelková frá Tékklandi seinna í dag og Jóhanna og Sunna Ösp Runólfsdóttir spila gegn Meike Behrens og Tabea Sänger frá Þýskalandi.
