Þrjú á leið á kastmót í Arles

Þrír Íslendingar taka þátt í Vetrarkastmóti Frjálsíþróttasambands Evrópu sem fram fer í Arles í  Suður-Frakklandi helgina 20. og 21. mars. Óðinn Björn Þorsteinsson, FH, tekur þátt í kúluvarpi. Ásdís Hjálmsdóttir, Íslandsmethafi í spjótkasti úr Ármanni, er skráð til leiks í spjótkasti og hin fjölhæfa Helga Margrét Þorsteinsdóttir tekur þátt í kúluvarpi og spjótkasti í unglingaflokki sem ætlaður er keppendum undir tvítugu.

Óðinn Björn fer utan ásamt þjálfara sínum, Eggerti Bogasyni, á mánudag en þeir ætla að nýta næstu viku fyrir æfingabúðir ytra. Óðni hefur síðan verið boðið að taka þátt í kúluvarpskeppni Växjö laugardaginn 27. mars og segir Eggert að stefnan sé sett á þátttöku þar.

Ásdís og Helga Margrét fara til Frakklands eftir viku en með þeim í för verður Stefán Jóhannsson, þjálfari þeirra. Eftir mótið í Frakklandi fara þau þrjú til Tenerife þar sem þau verða við æfingar um nokkurra daga skeið.