Úrslitakeppnin í blaki hefst í kvöld

Úrslitakeppni um Íslandsmeistaratitil í blaki karla og blaki kvenna hefst í kvöld. Í karlaflokki er spiluð þessi hefðbundna úrslitakeppni líkt og undanfarin ár en breytingar urðu á keppni í kvennaflokki eins og tilkynnt var í haust.

Fyrsti leikurinn í úrslitakeppni hjá konunum fór fram í gær þegar Þróttur R tók á móti Ými í neðri úrslitum. Í neðri úrslitum spila þrjú neðstu liðin í Mikasadeildinni, Þróttur R, Stjarnan og Ýmir. Heimastúlkur báru sigur úr bítum í leik gærkvöldsins, 3-1 í jöfnum og skemmtilegum leik.

Í kvöld hefst keppni í efri hlutanum þegar HK mætir Fylki í Digranesi kl. 21.00. Á undan þeim leik er svo stórleikur HK og Stjörnunnar í undanúrslitum í karlaflokki en sá leikur hefst kl. 19.00. Þar leika saman liðin í 2. og 3. sæti deildarinnar. Á Akureyri mætast svo KA og Þróttur R, liðin í 1. og 4. sæti, sem er einnig leikur í undanúrslitum. Tvo leiki þarf að vinna til að tryggja sér sæti í úrslitum um Íslandsmeistaratitilinn. Keppni í karlaflokki verður lokið fyrir páska.

Á morgun verður svo leikur Þróttar Nes og KA í Neskaupstað en fjögur efstu liðin í Mikasadeild kvenna leika sín á milli, heima og heiman í tvöfaldri umferð. Þeirri keppni lýkur þann 10. apríl nk. þegar Íslandsmeistaratitli í blaki kvenna verður hampað.

Allt um næstu leiki má finna á www.blak.is