West í raðir Boston á ný

Derrick Rose leikmaður Chicago er með boltann og Delonte West er til varnar. Reuters

Bakvörðurinn Delonte West hefur samið við Boston Celtics í NBA deildinni í körfuknattleik. West lék með Cleveland Cavaliers á síðustu leiktíð en hann þarf að taka út 10 leikja keppnisbann í upphafi næstu leiktíðar.

Þetta er í annað sinn sem West gengur í raðir Boston en hann lék með liðinu í þrjú ár áður en hann fór til Seattle í leikmannaskiptum þar sem að Ray Allen kom m.a. til Boston. West hefur skorað 10 stig að meðaltali í leik á ferlinum.

Hann var dæmdur fyrir ólöglegan vopnaburð í Maryland og þarf að taka út skilorðsbundna refsingu sem felur m.a. annars í sér að hann getur ekki tekið þátt í fyrstu 10 leikjum Boston liðsins.