Flottur endir á fínu tímabili
Arna Stefanía Guðmundsdóttir. mbl.is/hag
„Þetta er búin að vera glæsileg helgi hjá krökkunum. Við erum með þrjár stelpur sem fara yfir 5.000 stig í sjöþrautinni og það hefur ekki gerst áður hjá Íslendingum. Arna Stefanía er reyndar í flokki 16 ára og yngri, en hún setti Íslandsmet í sínum flokki, fékk 5.029 stig og bætti meyjamet Helgu Margrétar Þorsteinsdóttur frá 2006, en menn héldu þá að það yrði langlíft. Þetta er flottur endir á fínu tímabili hjá þessum krökkum,“ sagði Þráinn Hafsteinsson frjálsíþróttaþjálfari í samtali við Morgunblaði í gær.
Íslendingar sendu fjóra keppendur á sænska meistaramótið í fjölþraut og komu þeir heim með eitt gull, tvö silfur og eitt brons sem verður að teljast glæsilegur árangur.
Arna Stefanía sigraði í sínum flokki, Kristín Birna Ólafsdóttir, sem er í ÍR líkt og Arna Stefanía, varð í öðru sæti í kvennaflokki með 5.363 stig, sem er hennar næstbesti árangur og annar besti árangur í sjöþraut í ár. Sveinbjörg Zóphoníasardóttir, USÚ, varð síðan í þriðja sæti með 5.044 stig sem er hennar næstbesti árangur. Loks fékk Ingi Rúnar Kristinsson úr Breiðabliki silfur í flokki 17 ára er hann fékk um 6.100 stig en heildarúrslit lágu ekki fyrir í gærkvöld.
Nánar er fjallað um íslensku keppendurna í átta síðna íþróttablaði Morgunblaðsins í dag.
