Giants hreppti Ofurskálina

New York Giants lagði New England Patriots að velli, 21:17, í úrslitaleiknum um Ofurskálina í bandaríska ruðningnum sem fram fór í Indianapolis í nótt.

Giants komst í 9:0 en Patriots var hinsvegar komið í 17:9 að loknum þriðja leikhluta.

Tom Brady átti möguleika á að tryggja Patriots sigurinn á lokamínútunni en vörn Giants náði að stöðva sendingu frá Tom Brady og þar með voru úrslitin ráðin.

Eli Manning, leikstjórnandi Giants, var valinn maður leiksins en sending hans á Mario Manningham fjórum mínútum fyrir leikslok réð úrslitum þegar upp var staðið. Manningham sýndi ótrúleg tilþrif þegar hann náði að grípa boltann við endalínuna.