María í öðru sæti í Noregi

María Guðmundsdóttir. mbl.is/Guðmundur Jakobsson

María Guðmundsdóttir hafnaði í öðru sæti á stórsvigsmóti í Noregi í gær og Helga María Vilhjálmsdóttir endaði í níunda sæti.

María komst þar með enn á verðlaunapall á mótum vetrarins í Noregi og Helga María náði sínum besta árangri í vetur, miðað við FIS-punkta, og hækkar í kjölfarið væntanlega verulega á heimslistanum.

Alls voru 59 keppendur í stórsviginu og 43 þeirra luku keppni. Auður Brynja Sölvadóttir hafnaði í 38. sæti en Tinna Rut Hauksdóttir var í hópi þeirra sem náðu ekki að ljúka keppni.

Þær kepptu einnig á miðvikudaginn en þá varð Helga María í 14. sæti og Auður Brynja í 44. sæti af 45 sem luku keppni en þá voru María og Tinna Rut í hópi þeirra átján sem náðu ekki að ljúka keppni.