Anton Sveinn McKee úr Ægi hjó afar nærri Íslandsmeti sínu í 800 metra skriðsundi á HM í Barcelona í dag. Hann kom í mark á 8:08,70 mínútum en Íslandsmetið er 8:08,09. Anton var sjálfur ekki sérlega sáttur við sundið.
„Ég byrjaði vel og leið vel í lauginni en svo þyngdist þetta. En ég læt þetta ekkert pirra mig,“ sagði Anton sem syndir 200 metra bringusund á fimmtudag og svo 400 metra fjórsund á sunnudaginn.
Anton varð í 25. sæti af 34 keppendum. Hann hafði áður sett Íslandsmet í 400 metra skriðsundi á sunnudaginn.
Á heimasíðu sundsambandsins er haft eftir Jacky Pellerin landsliðsþjálfara að árangur íslensku keppendanna á HM sé í góðu samræmi við undirbúning.