Telma Rut Frímannsdóttir úr Aftureldingu og Kristján Helgi Carrasco úr Víkingi vörðu bæði titla sína á Íslandsmótinu í kumite í karate í dag.
Telma Rut varð þar með Íslandsmeistari fimmta árið í röð, en hún hefur sigrað í opnum flokki síðan hún fékk aldur til að keppa þar, átján ára gömul. Hún sigraði einnig í sínum þyngdarflokki, en ekki var keppt í liðakeppni kvenna.
Kristján Helgi varð þrefaldur meistari því hann sigraði einnig í sínum þyngdarflokki og í liðakeppninni, en það hefur hann gert síðustu þrjú árin.