Eins og greint hefur verið frá á mbl.is varð Hrafnhildur Lúthersdóttir í dag fyrst íslenskra sundkvenna til þess að komast í úrslit á heimsmeistaramóti í 50 metra laug, en Hrafnhildur hefur einnig komist í úrslit á HM í 25 metra laug. Hrafnhildur var að vonum alsæl í viðtali sem birt var á fésbókarsíðu íslenska landsliðsins í sundi.
„Þetta var alveg ótrúlegt. Mér leið ekki alveg jafn vel fyrir þetta sund og í morgun. Þetta var mjög tæpt. Ég beið með hjartað í buxunum eftir úrslitunum eftir því að sjá hvort að ég kæmist inn í úrslitin. Svo sá ég að ég væri í áttunda sæti. Þetta er geðveikt og ég er ótrúlega ánægð.“
„Núna get ég hvílt mig fyrri partinn a morgun og vonandi get ég gert enn betur í úrslitunum annað kvöld.“
Hrafnhildur keppir til úrslita í 100 metra bringusund á morgun, þriðjudag, nánar til tekið klukkan 16.17.
Sjá: Hrafnhildur keppir fyrst kvenna til úrslita á HM